النبض الواصل …معوض حلمي
بقلمي الفلاح الفصيح معوض حلمي
منشأة بطاش
تمي الأمديد
دقهلية
مشتاق لبياض القلب الباين في عينيها
الضي الطالل من ستي كان سارح تفاريح
كات تجمع كل حمام الدار حواليها
كات تقعد تحكي الحواديت تسابيح
كات تبعت كل حنانها يطيب لي الاحلام
كنت بانام لما اسمع صوتها تغني لي
( نام .. نام .. وانا اجيبلك جوز حمام )
كات روحها بتحرس روحي وتدعي لي
كات إيدها تطبطب زي حنين الناي
كان حضنها سكر بيحلي اللقمه الحاف
كات تفرد نن عنيها مراتب للبرد الجاي
وتشد الرمش على عنينا لحاف
كات زي آدان بينادي عيال الدار للنور
تبدر حواليهم كل جمال يخضر سنابل
كات ضحكه وفرحه في غيطنا البور
كات زي صبايا الحور وغناها بيلم بلابل
كات تاكل بعد ماناكل وتشوفنا شبعنا
وإزاي نتعب والنبض والواصل منها حياه
لما بتضحك ضحكتها بتمسح مدامعنا
ونلآقي قلوبنا بتطرد من جواها الآه
قبل مااخطي العتبه لبره كات تعدل ياقتي
كات هى مرايتي وشيفاني باشد الحيل
وانا سارح ويا الآه من بعد ماماتت ستي
لاحد بيعدل ياقتي ولاعين بتشوفني جميل
التعليقات مغلقة.