الي امي .ياعيد الربيع.بقلم.اشرف الشناوي
في شم النسيم وعيد الربيع
بقولك واحشني كلامك وصوتك
ولمتنا يامه بناكل فسيخ
مشلتت ورايب ولمة حبايب
ياست المقام
ياقلب أخضراني مايعرف ملام
وطايره مابينا كانك وجنه
ماليها السلام
وغيه بتشغي ماليها الحمام
حمام كله بلدي بلونه الجميل
بيحفظ ويسمع يوماتي الهديل
غيابك كسرنا وفرقنا يامه
وزود وجعنا وشق القلوب
وعلا مابينا جدران وطوب
بعدنا وتوهنا في درب الحياه
نسينا الحكاوي وكل الغناوي
ولا عدش فاضل يادوب الا ياااه
ياه عاللي كان
حكاويكي يامه ياقبله وميزان
ياريتك فضلتي شويه كمان
عشان يعني نشبع ونشرب حنان
من الفجر صاحيه يااحلى ابتسام
يانجمه في سمانا يابدر التمام
ياشقه بايدك تلال الغمام
ياراسمه ابتسامة صباحنا
اللي جاي
ياقهوة فرحنا ياسكر في شاي
ياغنوة شقانا ياسانده القلوب
يالمه الوجايع في حجرك تدوب
ودايما بتدي وتمحي الذنوب
ياريتك فضلتي
عشان يامه اتوب
اشرف الشناوي
شاعر عاميه
التعليقات مغلقة، ولكن تركبكس وبينغبكس مفتوحة.