امن قومى بقلم..رضا ابو الغيط
يا حبيبتي
ضُمي قلبي ليكي ضُمي
وانسي همك وانسي همي
وابدري بالفرح قلبك
واكتبي اسمك بدمي
يا حبيبتي
صدقيني
لما أقولك انتي عيني
والجمال اللي ف سنيني
وان حُبك جوة قلبي
أمن قومي
ياحبيبتي
مش هبالغ لما أقولك
عودك المفتلول بصبرك
والكلام اللي ف صمتك
أمن قومي
نيلك الطارح ملامحك
والغيطان الطارحة قمحك
والحنان اللي ف صبحك
دم ابنك
ضي شمسك
بدرك العاشق لهمسك
أمن قومي
ياحبيبتي
يلا هٍمي
وامسحي بإيديكى همي
واللي هيفكر يقرب
من حروف اسمك ياامي
راح يلاقي خط احمر
مش هيرحم أو يسمي
ع اللي حاول
يقطف الورد اللي طارح
فوق خدودك
واللي فكر يوم يغير
لون ملامحك أو حدودك
راح يلاقي خط احمر
مش هيرحم أو يسمي
ع اللي نفسه مرة يلمح
دمعة نازلة من عيونك
وف عيونك يقرأ همي
يا حبيبتي
مش ببالغ لما أقولك
إن وردك وان فلك
خط أحمر
وان شمسك وان ضلك
خط أحمر
وان اجراس الكنايس
والمصانع والمدارس
خط أحمر
وان أصوات الجوامع
واللي ساجد واللي راكع
خط أحمر
وان حبك جوة قلبي
أمن قومي
التعليقات مغلقة.