انا المصري. بقلم: محمود فوده
أنا المصري
انا المنتج وانا المخرج
بوزع كل ألحاني
أنا اللي زرعت فيكي الخير
شربت المر لكعاني
انا المهموم عشان حالك
ولا اهتميتي علشاني
انا الجندي اللي حاميكي
ويوم ما اناديكي نسياني
انا اللي رويت عطش أرضك
بروحي ودم شرياني
انا اللي رفضت طوب الارض
عشان إنتي اللي سكاني
هواكي مسك من عنبر
نسيمك عطر إدماني
فلو يوم كنت متكبر
ما ارد إسمك على لساني
في حالة يأسي بتأثر
وحافظه ملامحي وكياني
تعبت لإمته انا بصبر
هشوفك امته فكراني
أموت ولا إني يوم أغدر
بحبك وانتي بَيعاني
عليا تعز أنا نَفسي
لو يوم كنتي كرهاني
قوليلي إزاى اكون ضدك
وساكنه فيَّ وجداني
ما بعشق في الحياه قدك
وعمر ما كنت شرياني
ومهما يزيدني من كدك
فداكي ما كل شئ فاني
بحبك بس نفسي أعرف
لامته في حكمك الجاني
قوليلي إن كنت انا إبنك
ف ردي ان كنتي سمعاني
د حالك مال ومات زرعك
وجفت كل ودياني
واما امدلك إيدي
في حلمي الاقيكي بعداني
كفايه في غلبي بتزيدي
قساوتك ليه مأنساني
يا أم الدنيا كل الدنيا
يا حبي وكل أوطاني
معاكي الدنيا حاجه تانيه
في خانة الظلم أسراني
وليه حلمي أنا ضايع
أبات ودموعي كوياني
انا مش ممكن اتغير
على حبك على عشقك
دا طبع المصري عرفاني
ومهما بعدتي يوم عني
أقول إنتي اللي وحشاني
التعليقات مغلقة.