انا فوضوي شعر وحيد علي الجمال سرس الليان محافظة المنوفية جمهورية مصر العربية
انا فوضوي
وحياتي في دنيا الهوى كراكيب
اذا شفت منها بعضها
كان حقها
الضرب بالمراكيب
الفرض فيها سنه
والسنه أيضا فرض
وفيها الحب ممكن
تبيعه جملة وفرط
وكتير بيبقي سهل
من غير عقد ولاشرط
تلقاه حتى في صِدقُه
الطول شبيه بالعرض
الكركبه محنه
والفركشه دي شرد
الفرق في الترتيب
نزرع مابينهم ورد
اما اللي فيه فحكشه
ابدا مايرجع صبي
القلب أصبح كهل
دي حقيقة مدهشة
متنعكشه متفركشه
مقلوب كيانها
وحيطانها واقعه متدششة
وقت الجروح متنكسه
والصبح بدري بين الندي
تلاقيها واقفه متشمسه
على طابعي ملزوقه بنشا
وتحس اني مش طايقها
وساعات حاضنها
وكتير رافضها
بلعن وجودها
واحتلالها لجرئتي
بعشق جنانها واختلالها
واختلافها واموت
اذا فردت على كتفي الشتا
ابكي بحرقة
واضحك بسرعة
ومشاعري مش متكلفه
لكن كمان
مش مضيفة ولا مدرسة
هي حكاية متلخصه
عيشها طبيعي مفصصه
قلبك إذا بحُبه اعترف
اوعى في مرة تكسفُه
التعليقات مغلقة.