انا لسه قصيدة مكملتشِ…

أحمد زيدان

شرع الحياة فيكي كله بأمر الله

انا لسه قصيدة مكملتشِ

انا و الخوف و الظروف
ملامحنا تشبهنا
حقيقي كارهين بعض
ولا كنا متفقين
ولا عدنا متفاهمين
‏بس الالم واحد ، و السكه جمعتنا
انا يوم ، اتنين ، اسابيع ، و شهور
وسنين تنعد و تملي بحور
انا جوا ظلام ، الليل ، مأسور
اكرمت الحزن ، بضحكت وجع
من كتر الضحك بقيت مهموم
مش فارق جدا والله
السما صافيه أو فيها غيوم
انا نفسي أقابل ناس ينسون
عاملين حالهم
ك غيامة صيف
ولا شتيت
ولا بلت ف الأرض خيالهم
الظل النابع من عينهم ف القسوة خفيف
ناس ف حياتهم
بيحبوا لبعض يا ناس الخير
يقعدوا مع بعض بطيب نيه
من غير ازاى ولا قال و لاقيل
يبقوا ف حالهم
ع الجري لهم ما يقولوا للغير
ناس م الاخر اشكال الطير
شبه العصفور ف الصبح يغرد علي بيتنا
ب صباح الخير
بيت العيله وجو اللمه
خوفك علي اخوك حاجه مهمه
الجو ربيع علي شكل خريف
الشعر ساعات بيكون تخاريف
الوزن خفيف
لكن مضمون الحكي نضيف
انا حد الحد الان من جوا ضعيف
انا عندى كلام أضغاث احلام
و خصام الفكر فتات ايام
انا كنت بنام
قبل الاوجاع ما تقيم الليل
قبل الأحزان ما تصاحب قلب وعمر جميل
انا عمري ماكنت اعرف
أن المظلوم و أن المجني
علشان ما ينام يحتاج لدليل
عشان ما يهدي ظنون الفكر
محتاج للموت ف حياه علي هية سُكر
انا مين ، انا ايه
و لفين رايح
انا خوف ملفوف ، انا طعم حروف
‏انا لسه قصيدة مكملتشِ