انا مشتاق قوى يامه…….إلى امى النائمه فى قبرها …شعر اشرف الشناوى
ورب الكون مافيه غيرك
دخل قلبى وتبت فيه
ودق اوتاده بالقوه
بوضع اليد
والا قلبى فتح بابه
لغير كفك وكلم حد
ومش قادر يقول وصفك
ياسر فى قلب تكوينى
وبعدك نار بتكوينى
ياقلب بيدى مابياخد
وحبل الود م الواحد
ولو قلبى نكر خيرك
يكون جاحد
يافجر يوماتى يتوضا
يرتب دنيتى الفوضى
يطبطب عالجراح
ويضحك ويبقى السد
ورب الكون مافيه غيرك
بنى بعدك جدار انهد
هاجيلك يامه كالعاده
ونضحك يعنى بزياده
وتحكيلى حواديتك
واقولك ايه نقص منى
ومين غيرك يطمنى
ويغسل روحى بالراحه
وافرغ همى فوق حجرك
فيطرح فرحى فوق ملحى
ويدبل فى الوجع جرحى
ورب الكون مافيه غيرك
فى عز القسوه بتسامحى
وتتصالحى
دا انا قشايه من غيرك
ياخدها الريح ويرميها
حسب كيفه
على رقبتى الزمن حاطط
كمان سيفه
ويدبحنى الوجع يامه
مفيش غيرك هنا بنا
ولا قلبى رجع بعدك
فى يوم غنا
والا اتهنا
فلمى جراحى بكفوفك
وضمى فى روحى
مية ضمه
انا مشتاق قوى يامه
اشوفك واترمى
فى حضنك
فضمينى كمان ضمه …………..
شاعر عاميه
المنصوره
البرامون
التعليقات مغلقة.