انتى اللى ليكى الشوق بقلم.صفوت راتب
وانتى اللى ليكى م الحنين أوِّل
بشايره،
وكحل عين تسهر ليالى سهدها
وانتى اللى ليكى الشوق ،
وماله منتهى
بحرين حنان فى القلب يجرى،
موجه هادر،
ع الشطوط بيفيض على الدنيا
وع الناس كلها
إسمك حروفه عقد لولى بنطقه
من قبل ما اتهجى الحروف،
من قبل إسمى، والأسامى
عاشقه فيكى نطقها،
يا حضن دافى فى الليالى،
ونجم عالى فى السما،
إنتى اللى نورك فى العيون
فتَّح لها أجمل نهار،
نوَّر دروبها المظلمه
بعشق بهاكي،
وبعزف الأشواق غُنَا،
يا مكلبشة فى الروح
فى قلبى معشِّشه
علِّمتى قلبى الحبّ إيه معناه
وإيه معنى الحياه ..!
وازَّاى نعيش العمر بيكى
نعيشه ليكى
ازَّاى إذا عشقنا الجميله
نمووووووت ونحيا ف عشقها ..!
#صفوت راتب
التعليقات مغلقة.