انتيكات…شعر وحيد علي الجمال
جوه قلبي ركن غاوي
انتيكات
وان سهيت انا عنه ساعه
يغيب هناك و بالساعات
اصل قلبي من زمان
وهو غاوي انتيكات
وإن عدا حب عليه وفات
وعمل في بعده حبشتكات
يصدر أوامره من سكات
يدخل في خانة الذكريات
مش هي دي كل الحاجات
أنا قلبي اصلا له مواسم
بيحب يستعرض حاجاته
جوه القصايد يحكي حالته
وكل حب ووقت حظه
يكون في جنة
يكون في خانة المهلكات
مكنشي قصدي أجيب في سيرتك
بس سيرتك جت هناك
أنا مش هقلب في اللي فات
انت بالنسبالي ذكرى جوه فكره
والقصايد ياما فيها ذكريات
انت حاجه ف ألف حاجه مش فاكرها
تايهه وسط الانتيكات
لعبه قلبي كان حاببها زي غيرها
راح سايبها راح كاسرها
لما داست فوق كرامته
واستهانت بالمشاعر والاهات
قولتي رجعي
وقولتي سطحي
قولتي غيرته جوه قلبي
عامله حالة اختناق
خايف اهرب مني فيكي
فاتفقنا ع السكات
كات مجرد هدنه بينا
كان بيكبر جرح بينا
كان بيعلا سور مابينا
صدقيني..
قلبي بعد السور ده تاب
لما جيت اكتب قصيدتي
لقيتني بكتب انتيكات
شوفت ميت تاني يرجع
مهما تبكي ع اللي فات
انا مش نبي
مخلوق في عهد المعجزات
حلمك انت شوفت عكسه
قبل مايفسرني مات
قلبي بالنسبالي وانت
دول مجرد انتيكات
وحيد علي الجمال
سرس الليان محافظة المنوفية جمهورية مصر العربية
التعليقات مغلقة.