اه ياشجر التوت…بقلم اشرف الشناوي شاعر عاميه البرامون -المنصوره
اه ياشجر التوت عمال بتموت
والقطر بيصفر توت ورا توت
وكبرنا اوام زى الاحلام
وملامح وشنا ضاعت كدا
وسط الايام
عجزنا خلاص والشعر اهو شاب
والعمر دا صفحه في قلب كتاب
واتقفل الباب وكبرنا اوام
اه ياشجر التوت عمال بتموت
والقطر بيصفر توت ورا توت
اه يادمع العين ماتقول على فين
وخدانا الدنيا مابين خطين
مجاريح والريح يحدفنا معاه
مطرح مايروح بنروح وياه
كلنا دراويش على باب الله
اه ياشجر التوت عمال بتموت
والقطر بيصفر توت ورا توت
براويز عالحيط مليانه بناس
ياما حلموا وعاشوا
بمية احساس
وسابونا ندوق نفس الاحساس
اه ياليل بيلم النور في ايديه
ويدق الصبح في نن عينيه
فانقوم ونصلي وندعي عليه
ونلاقي الشط ملان غربان
ولا فهش مكان يستر عريان
فياخدنا الموج يحدفنا بعيد
نرجع ونكمل غناوينا
اه ياشجر التوت عمال بتموت
والقطر بيصفر توت ورا توت
ولا حدش حس بامانينا
التعليقات مغلقة.