اوعى تخاف …بقلم اشرف الشناوى شاعر عاميه البرامون …المنصوره
حاول ترجع
زى ماكنت
ركب فى ملامحك
واعدلها
والناقص منك
ارسمه بالتقريب
عافر فى الليل
عن حلمك
لو حتى الصبح
مجاش
مش كل اللى
يخش الانعاش
بيموت
واضحك لو لسه
فى قلبك
حته براح
الفجر بيجى
وكفه ملان افراح
طبطب على روحك
جواك
دا محدش هايحس
بوجعك الاك
الخوف بيهد
حيطان الامل المبنيه
ويسد اخرام النور
وبيحبس روحك
زى العصفور
الخوف مايخفش
الا من الضى
انما فى الضلمه
بيفضل حى
فاوعى تخاف
م الليل
او من عفاريته
وافرش امانيك
لو جرحك حتى غويط
الامل اللى انت زرعته
هيملا الغيط
والتوته هترجع
تانى تضلل عالبيت
حاول ترجع
زى ماكنت
بس امسك طرف
الخيط
ولحد ماترجع
تانى الشمس
وتدفى الكون البردان
اعملك فنجان
قهوه
الدنيا بترمى الحظ
فى ايها داهيه
زى الساقيه
اما تتدور
وبتسقى غيطان
البور
حاول ترجع
زى ماكنت
الهوى مابيقلعش
الا العود المكسور
قوم غنى الغنوه اياها
وافرد فى جناحك
على كل الملكوت
واضحك على اد ماتقدر
قبل ماتوصل للاخر
وتموت. ………………
التعليقات مغلقة.