اوعى تنسى…بقلم أشرف الشناوي

اوعى تنسى…بقلم أشرف الشناوي

اوعى تضحك
واوعى ياخدك
الابتسام
او تسيب روحك
فى لحظة
الانسجام
خلى بالك
م اللى جاى
خلى بالك م الجراح
او م الوجع
خلى بالك لو
شبعت
ان ياما كتير
وقابلك
فى الحقيقه
بيتخدع
تنسى خلق
الجوع قتلها
ذلها وشتت عيالها
خلى بالك
م اللى روحه
طالعه منه
واللى نفسه
فى ضحكه واحده
تبل ريقه
اللى حزنه زى
ضله
او صديقه
خلى بالك من
تصاريف القدر
شجره تكبر
شجره تانيه بتنكسر
خلى قلبك زى طير
فوق الشجر
واوعى تنسى
انك فى لحظه
من البشر
واوعى تكسر
اى خاطر
او تقول انك ذكى
او حتى شاطر
الحياه كلها
حبة مخاطر
دا انت اسم بيتكتب
او رقم وسط
الدفاتر
اوعى تنسى انك
عدم
وإلا رايح للعدم
واوعى تنسى
ان ربك قسم الخلق
لشرايح
كله ماشى بتعليماته
وبالوايح
كل ورد وليه
روايح
عيش وسامح
دا المسامح
عمره مايكون
غير كريم
اوعى تكره حد
مره
أساء إليك
بالمحبه بس تلقى
حتى طوب الارض
جالك
باس ايديك
اوعى تضحك
واوعى ياخدك
الابتسام
خلى روحك
جوا منك زى برج
ملان حمام
يومها بس تحس
انك
ايوا عايش
وف سلام
ايوا عايش وف سلام……

اشرف الشناوى
شاعر عاميه
البرامون