اول مالشتا بيطل…شعر اشرف الشناوي -شاعر عاميه البرامون -المنصوره
اول ما الشتا
بيطل
فيبوس الارض
ويحضنها
وبيغسل في
وشوش الخلق
فتبان معادنها
ويشيل العفر
المركون عالجدران
ويصحي التوت
النعسان
من احلاها نومه
الشتا بيدفي
الروح البردانه
ويرص الاحلام ويانا
ويهد الوجع
اللي متبت جوانا
الشتا بيكسر
في سكاتنا
وبيفرش في الصبح
غيطان ياسمين
وبيعمل م الفجر
الميت
بساتين
ويدق بيبان الدور
ويزق النور. جواها
الشتا بيكحل
عين الارض
فتصلي الفرض
وبتلبس فستانها الشيك
للعرض
الشتا وياه النوته
لأجمل غنوه
من غير ولا عود
ولا ناي
بيغني الكلمه الحلوه
الشتا من غيره
الدنيا متبقاش دنيا
ويدفي الارض
فتحبل منه غناوي
وتحس بطعم الشاي
عالراكيه
فتشرب تاني
الشتا لو طل
تلاقي كفوفه ملانه
اماني
وتحس بضحكه
تغير كل ملامحك
وانت في عرض ثواني ……….
التعليقات مغلقة.