ايه الضمان….. تهاني بركات
ايه الثابت في دنيتنا ؟
ايه الضمان ؟
كل حاجة عايزة دليل
حتى روحك جوه نفسك
واخده قرارها بالرحيل
كله احتمال
و الوجع هد الجبال
و الخيال أصبح محال
كل حاجة ملخبطة
الفوضى هي الأساس
و الناس من غير احساس
تعظيم سلام للبلطجي
اسمع كلامه و انحنِ
لحياتك تصبح في خبر كان
الفيلم هابط و المسرحية
عدت خطوط الانسانية
و الناس ما بقتش هي
كل حاجة بره اللوايح
ما فيش قانون يمنع كلامك
حتى ضعفك وقت جرحك
لسه خايف من طباعك
صعب جدا اختيارك
مستحيل تتحدى نارك
أصل السفن تايهة ف بحارك
و الحنين ساجن قرارك
رافض وداعك
السيناريو هو هو
كام دمعة و كام حلفان
أنتِ الحبيبة و الوطن
أنتِ الأمان
أنتِ اللي محفورة
جوه قلبي من زمان
أنت الرهينة و الرهان
أنا قلبي من غيرك جبان
خايف يحارب يخسرك
خليني أحسن في الضمان
هو ايه معنى الضمان ؟
٢٢ / ٦ / ٢٠٢٢
التعليقات مغلقة.