باب الشعر…
وحيد علي الجمال
( باب الشعر )
دخلت باب الشعر
عديت على ديوانك
لقيت قصايد هم
ساكنة على بابك
يمكن يكون الحر
أثر على جَنَابِك
او يعني بعد الشر
داء الهوى جالك
دَوِّبت حبة مر
على كام جرام علقم
حطيت شوية صبر
وكام جرام زعتر
فصين ليمون تبقى
تحويجه م الآخر
تنام كدا ساعتين
يبقى العلاج فاخر
تعرف ياواد في الصيف
البرد دا مجرم
يلبد كدا في العظم
وكأنه متكسر
ويادوب تروح الشغل
ماشي و متلصم
انا كنت بحكي فى ايه؟!
فكرني بالراحة
انا عقلي مش دفتر
وشربت رغم الهم
ورفضت قلبي يئن
يمكن في مرة تحن
وتشوفني بالمقلوب
انا حلوه يابني بجد
وهزاري وقت الجد
اموره تتغندر
ليه بس انا حاسه
ان انت رغم الحب
قلبك كدا معطوب
امتى في يوم هتشم
ويكون لأهلك دم
وتعترف انك
عاشق وانا المعشوق
وتيجي تخطبني
ايوه كدا بالذوق
لحسن ورب الكون
انا هعمل لك مجنون
وامشي أحدف طوب
تقدر على جناني؟
وشوشني ليل الشتا
كأنه يعرفني
انت اللي عامل نبي
بالعشق توصفني
وراسمني وسط السهر
غرقان في بحر دموع
وان شوفت طيفك هوى
اجري كما المجذوب
لا عشت يوم عاقل
ولا كنت يوم مجنون
الشعر م الآخر
صاحبه ماهوش موزون
ساعة تحلف ان سيادته
أعقل واحد في الكون
والثانيه ان شوفته هتقسم
من يوم مولِدُه مجنون
وحيد علي الجمال سرس الليان محافظة المنوفية جمهورية مصر العربية
التعليقات مغلقة.