باب مصر…كلمات محمد كسبه
علي باب مصر
هنكتب كل كلامنا الحلو
و نرسم جوه عيون الصبر
أحلام بتطير في الجو
كلنا شاربين في عسلها المر
فرمنا أهل السو
إللي بيقصد ليها الشر
هيلاقي علي بابها العو
و اللي بخير جاي يمر
هيلاقي قلوبنا الضو
علي باب مصر
قلوب و عيون
و إيد بتطبطب
ع إللي يصون
و إيد بتكهرب
دايما ترعب إللي يخون
علي باب مصر
فرحة و دمعة
و ناس يامه
ساكته و سامعه
و ناس تقهر قلب الضلمة
بأصغر شمعة
و ناس عمرها أبدا ما تخفاف
عشان قلبها واضح شفاف
و بتدعي لنا حد و جمعة
علي باب مصر
مفيش مجروح
علي بابها شباب
كله طموح
علي بابها إرادة و عزيمة
و جنود مبتعرفش هزيمة
و نسمة هوا بترد الروح
و عطر شهيد دايما بيفوح
بيردد و بنية سليمة
مصر بلدنا قوية عظيمة
التعليقات مغلقة.