“بادفع للفرح بقشيش”…شعر
سيدة القصاص
ماباسألش اللي.. يجرحني
عن الأسباب..
وباكتم همي في جراب
الألم وباعيش
وبادفع للفرَح بقشيش
عشان يسمح
ويدخل لي ويتغلب
على الأحزان
وينشلني من “الغَوَاصان”
فـ بحر الخوف
ساعات يركبني ميت
عفريت وباتجنن من الأفعال
لكن بارجع أشيل فـ
عصاية الإرضاخ..
وباستسلم….
لعالم كنيته استنساخ
ومشكلتي…
باشوف العالم الهزلي مولِّي
القزم عــ الأفيال
وشال التقوى ومنيِّم
مكانها ضلال
ياخلق ياهوه كلام الشعر
داب مني وتاه مني
هرب خزلان
… بيتمرد على قلمي
ومن حقه يكون مخسوف
هايخرج ليه ؟
مادام الزيف ماهوش مكسوف
ومين هايقدَّر المقامات ؟
مادام السوق بقى يلملم بضاعة
ماتسوى كام ” حلوف “
وضاع الحُسن
واتجرجر على النَّصْبَات
خلاص الحرف بيولِّي وبيرتل
لي ف اللعنات
وأنا مسلوب وموجة عزمي
عطشانة وخالي الجوف
ومالت أهرامات
النور على سنانها وراح الشوف
وتاه الوصف بين واصف وبين موصوف
ولبس ” القرد ” واتبغدد تاج الغزلان
وآه يازمان…
.
التعليقات مغلقة.