باضحك على حالي…. تهاني بركات
باضحك على حالي….
حاولت أكتب
و أطَلّع كل اللي جوايا
لقيت قلمي بيقولي ما كفاية
كتبنا كتير
و أنا بضحك
على حالي و ترحالي
ما بين جرحين
جرح قديم أنا عايشه
و عامل نفسي مش شايفه
و جرح جديد
راسملي السكة و أنا أعانده
و قول بكفاية و أصالحه
لكنه هلكني بعناده
و بصبري عليه فكر حاله
هيغلبني…
أنا يمكن أكون هشه
و جوايا كثير فوضى
لكن في الأصل مصرية
و اسمي على كل بردية
أحزاني باكتبها
و أنفخ فيها أطيرها
و دموعي بامسحها
بورق التوت
دبلانة لكني عَفيّة
و غصوني ماليها التوت
أنا قاسية بس عليا
وفي طبعي ما فيش حنية
و بيقولوا على قلبي
مليان جبروت
ما ياما كنت ملاك
و باكتب أنا روايات
عن الحب و الطيبة
و أسامح اللي جارحني
و أساعد اللي محتاجني
و تهت كثير في بحورهم
وأصدق كل ألاعيبهم
لحد ما استكفيت
فاستقويت على جرحي
و قلت خلاص مش هابكي
هاضحك أنا على حالي
و أداوي علتي بنفسي…..
٤ / ٨ /
٢٠٢٢
التعليقات مغلقة.