بتعافر … شعر طه علي الدين

و تقضى العمر بتعافر
بعين مؤمن و عين كافر
مآمن بالرضا و نفسك
تعيشلك مره من نفسك
ما بين أملك و بين يأسك
بتقضى الحياه حيران
و لا محسوب على الفايقين
و لا باين عليك سكران
عايشها جنان
بتضحك لجل تتمطن
إنك بس، لسه فلان
و تسكت و انت متألم
بتتأوه من الحرمان
بتتأمل فى حال الناس
ما بين مهووس و بين عاقل
و بين منحوس و متفائل
و ناس دايسه ناس بتدوس
ضحايا نفوس
فتشوف الحياه غابه
ووحوشها احنا و ديابه
و عشان النفس كدابه
بيظلم جهلها الإنسان
بيظلم جهلها الإنسان!