بحبك آه…. شعر السيد الشيتي
بحبك آه ومُش مغصوب ولا مغلوب على أمري
بحبك آه ومُش خايف ولامرعوب ودا قَدري
بحبك آه ياسكناني عشانك ضاع ربيع عمرى
دا حبك نور خلاني أحب الليل عشان فجري
بحبك آه وانا فرحان وانا حزنان وانا موجوع
بحبك آه وانا بردان وناسي اِن ليا ضلوع
بحبك آه وانا شبعان وانا هفآن بموت م الجوع
بحبك آه وانا ف النور وف الضلمه بتبقي شموع
انا مصرى ومصر معلمه فيَّه
اسمر بلون النيل وملامحي مصريه
أعشق سواد الليل والخُضره والمَيه
دا مصر أمى وأبويا والقصد والنيه
بلدي ياشيلانى على ضهرك سنين
عشقت أحزاني وشايلك جوه نني العين
وشربت من نيلك ورجعت لك عطشان حنين
وغزلت من ليلك حكاوى السهرانين
ياللى غيطانك من زمان سكتها حفظاني
والقمح طارح سنابل وسابل خير رباني
والفلاحين حبهم يجري ف شرياني
عمرى ماهنساكي ولو أيامي تنساني
التعليقات مغلقة.