بحب الناس…كلمات / أبومازن عبدالكافي .

بحب الناس…كلمات / أبومازن عبدالكافي .

بحب الناس

وبعشق إيد كانت دايما

تشيل الفاس

تخضر أرضنا وتزرع

ومن بينا ..

الشرور تقلع

وبإديهم نجيب قوتنا

ولا يفوتنا ..

إدين تبني لنا بيوتنا

تنور بيها حتتنا

وإيد شغالة في حارتنا

تخلي الحارة زي الماس

إيدين تنباس

وإيد تانية بمدارسنا

تعلمنا …

وتكتب لينا ع التختة

وفي الكراس

وتمحي الجهل عن روسنا

وتبني العلم ..

يبقي أساس

وقبل الكل …

إيد أمى وإيد أبويا ..

اللي ربوني ..

وضحوا كتير على شاني

وكانوا ف ضلمتي ..

نبراس

و دعواتهم بتحييني

و تحمينى

ودايما كانوا ويايا ..

كما الحراس

واخويا وأختي ..

وصديقي

بنورهم ماشي

في طريقي

يشاركوني في أفراحي

يباركولي .. يهنوني

وببقوا معايا في ضيقي

يواسوني .. يقووني

وجودهم …

زي تاج ع الراس

بحب الناس

كلمات أبومازن عبدالكافي .

عبدالكافي فاروق عبدالكافي بطل.

9/7/2021 صباح الجمعة .