بحور الشعر
بقلم الفلاح الفصيح معوض حلمي منشأة بطاش
تمي الأمديد دقهلية
الشعر لو كان كلام
هانقوله … ونغالي
الشعر ده إحساس
متربي … ع الغالي
إن كات مشاعرك
صنم وأرضك بور
فالمعنى واد غندور
يصفى … ويهنالي
والكلمه بنت بنوت
حلوه بطعامة التوت
وجمالها … يحلالي
هاكتبها لو مجروح
عشان تداوي جروح
وتحيي فيا الروح
واروح على بحورها
بحر الطويل طوالي .. الطويل
غيرلي ….. احوالي
مشيت على شطه
أغني ….. موالي
بحر ……. المديد .. المديد
في …….. العيد
جاي بالفرح زفه
لابس ياعم جديد
بحر البسيط بحري .. البسيط
نام على سطري
بان الكلام ع الكيف
كضيف جبر خاطري
بحر الوافر دا عمي .. الوافر
لقيته وف دمي
سال المداد يجري
بالفصحى والعامي
اعوم فبحر مضارع .. المضارع
وصفوني قال بارع
فجأة بقيت مشهور
في الحاره والشارع
نزلت بحر الكامل .. الكامل
مفيهوش ولا هامل
وحرفه طارح نور
غطاني …. بالكامل
بحر الهزج بيغير .. الهزج
وبيدعي …. للتغيير
شاف الوسط لايص
بيبني فينا ضمير
هب الرجز نادى .. الرجز
أنا زيه وزياده
هابني أنا شطره
يبقى البنا عاده
بحر الرمل على قده .. الرمل
نادى القريض شده
ميل عليه بحنان
وباسه من خده
بحر السريع طاير .. السريع
شاف الديوان باير
نفسه الحروف تلمع
تهدي اللي بان حاير
سلم على المنسرح .. المنسرح
رد السلام بالفرح
سمع الكلام منه
ونام وقلبه انشرح
وعام فبحر الخفيف .. الخفيف
أخوه وطبعه شريف
كل اللي زار شطه
رجع وقلبه عفيف
خالي كمان م الغضب .. المقتضب
حود على المقتضب
نال الرضا والجود
سالت حروفه رطب
بين السطور تتحس .. المجتث
يابحر ….. يامجتث
غرقني في المعنى
خليني عالي الحس
شاعر وصاحب قارب .. المتقارب
وادور على المتقارب
نهر القوافي فيه
مفتوح على الغارب
باعبي منه واشارك .. المتدارك
واروح على المتدارك
أقطف ورود منه
لحبايبي أهدي وابارك
……………………….
التعليقات مغلقة.