برا الكواليس…بقلم اشرف الشناوى شاعر عاميه البرامون -المنصوره
الدنيا ساعات
تديك احلام
وساعات تديك
شلاليت واقلام
وساعات ترميك
وفى اخر صف الحظ
وساعات بتقطع
جلدك بالسكاكين
وساعات تحلو
تحس الكون بساتين
وساعات تديك
احلام بالزوفه
وساعات ترميك
برا الكواليس
وبتعمل منك للمخاليق
دى بروفه
الدنيا غريبه وجدا
خالص
ضحكتها وراها
دموع وجراح وانين
ماهى ليها ياناس
مية وش ووش
لو ضحكت جدا
يبقى تغش
خليك وفى كل
وشوشها فريش
وان وجعك شدك
م الافراح ماتعش
وان دق الفجر الباب
خليه متوارب
واعمل من املك
صبح تعيشه وقارب
الدنيا الاصل وجودك
فيها انك هتحارب
وافرد فى السكه
امانى مادام مليانه
عقارب
الدنيا تملى بتغزل
فينا وتعمل فينا مقالب
واتشعبط مهما يكون
فى الضى
هاتعيش لو فاضل
فيك شئ حى
وان طال الليل
شخبط على وشه
بحبة نور
اليأس دا اكبر سجن
بيقتل روحك
من غير سور
فازاى هايطير
من غير جناحات
عصفور
الدنيا دى اجمل
شئ مافيهاش
غير زوور
ولحد مايوصل بينا
القطر
هنفضل فيها نلف ندوور …….. ………..
التعليقات مغلقة.