برواز إنسان … شعر هالة علي ابو الذهب
قرب جرب يمكن تقدر
تلقى مكان
أو إسمك يبقى له عنوان.
ولا تفضل تايه في الزحمة
بدون تصريح
شرط تبطل تبقى فصيح
دانت يا دوب برواز إنسان.
عايش على فيض الإحسان.
مش مسموح يطلع لك حس
ولا حد بوجعك حيحس.
أصلك حرف في جملة عصية
إعرابها محتاج قواميس.
وإن جيت تِهرب راح تتعتر
مزنوق بين علامات تنصيص.
نُصك شارد، نَصك خارج
عن كل قواعد التأليف.
يوم م تفكر تسِن سنانك
ويحسوك حتجن جنانك
يا مؤمن يلهوك برغيف.
التعليقات مغلقة.