بستان الغلابَه…
بقلم حسن أبو العرب
بستان الغلابَه
صبحت الصبح من بدرى
بدون ما ادرى
ألملم م الندى نسمات
وأصحى الشمس اناديها
تمد شعاعها واديها
فتقطف م النخيل تمرات
يطل الفجر فى عنيا
مراكب ضى م السموات
يحنى كفوفى بالفضه
ويجلي القلب لو صدا
كما يجلي الضيا العتمات
ويفتح م الصعاب سكه
كما فتح النبى مكه
شعاره الأمن والرحمات
ويملالُه الكفوف يشرب
بطل ينهض مع العاديات
على دروب السلام يضحك
ويهزم خوفنا والأزمات
يازَرع بلدنا ياطيب
ومتطيب بعَرَق
الأرض والهمات
ياقمح بلدنا وضِّيني
وطَمنى على الأمانات
ياشط النيل يا ابو المواويل
يافارش بالأمل بُكرا
وغازل م الجمال آيات
يا بستان الغلابه ازاى
تسلم ضحكِتك للناي
وناسَك ع الشقا صابرَه
تداوي جراحها بالدمعات
وانا العاشق لكل جميل
لا عمرى فى مره راح اطاطي
وانِخ واميل
وواهب روحى ع العتبات
قلوبنا من نسيج واحد
وكارهَه مِن يكون جاحد
ياناكر ربنا الواحد
بلدنا مسلمين واقباط
التعليقات مغلقة.