بشوفك يا بلدي
بقلم الشاعر جمال زكي عينر
بشوفك يا بلدي
وطول عمري شايفك
وعارف حدودك
وحافظ ملامحك
باسافر بلاد
يطول البعاد
وبارجع بلهفة
بيوحشني حضنك
بشوفك يا بلدي
واشوف فيكي نفسي
واشوف الحبايب
وأصبح وامسي
اشرق واغرب
ابعد واقرب
وبرضه مراكبي
في شطك بترسي
بشوفك يا بلدي
واشوف فيكي ولدي
حبيبي وعينيه
وضهري وسندي
وببدر تقاوي العروبة ف ملامحه
وساعة النوايب
بروحه بيفدي
بشوفك بتشقي
يا ارض الكفاح
بعرقك وجهدك
دي ارضك براح
بتسقي البرايا
بشهد العسل
وتبقي عروسة
ف ليالي الملاح
بشوفك وبادعي
لعواذلي يشوفوكي
واقول لو صحيح
كانوا يوم يعرفوكي
لفاتوا بلادهم
وهجروا الجيران
وكانوا بفروض الولاء يوعدوكي
بشوفك يا بلدي
يا اغلى البلاد
يا مصر يا غالية
يا كل المراد
في نيلك وهرمك
في شمسك وضلك
في زرعك وطينك
يا ارض المعاد
التعليقات مغلقة.