بقول مالي بقلم مسعدالبحراوي

كتير بسهر مع حالي
بقول مالي؟
مانا كويس
تشق الآههَ تنهيدتي
تسابق رجلي للخطوه
لفين رايح؟
مانيش عارف !
اعود من حيث كنت هناك
على كرسي ورا الشباك
جدار الصمت متشقق
وبتبرأ عيون منه
بخاف من روحي لو تنطق
ويسمعها رقيب وعتيد
اداري العين بكف الايد
واقول مالي مانا كويس

ادندن لحن مش معروف
يجر الصمت مني حروف
أخاف اكتبها تبقى ألم

وهو كتابي إيه ذنبه؟!
يشيل فوق طاقته وف قلبه؟!
أحاول أمشي عكس السير
اجيب النوته وابري قلم

اشغبط سطر واشطب سطر
وسطر يحن لحروفي
وأفكار ماشيه زي القطر
مابلحق حتى افسرها
ف بخسرها
عشان أرجع واقول
مالي؟!
أنا كويس
يمر الليل وألفين ليل
على دا الحال
وراس الفِكر يقلب ديل
أصدَر طارشه للأحوال
ولو حد اصطفى بسؤال
بصوت مكبوت
ارد وأقول
أنا كويس

أحن لطفل كان بلعب
ويتنطط
ويتعور ويتجبس
وجواه كوم من الأحلام
اقوم أجري على الألبوم
أكمل سهره وسط العوم
في بحر الذكرى والأيام
اشوفني هناك وأنا ريس
ولا يشغلني قيل ولا قال
مفيش في الذكريات قوال
وعين الناس كانت تحرس
ينط الصبح في دماغي
ويكشف عورة الليله
ويقلب صفحه في صداغي
ويرزع عالجبين شيله
أفز واقول أنا كويس
ج.م.ق

2020/5/25