بكره هاطير…اشرف الشناوى شاعر عاميه المنصوره البرامون
وفاكر انى لسه هاطير
وانا واقف على كفك
بقالى كتير
باغنى الغنوه إياها
فى سجن كبير
وصبح يعدى ويسلم
ويسيبنى اسير
وليل بيشق فى ضلوعى
وبغسل روحى بدموعى
وبملا البير
وبفرش فى الطريق احلام
وافصل م الوجع اوهام
واقول بكره يسيبنى اطير
مادام لسه الامل طارح
بحلم أخضر من امبارح
وضحكه تشق فى وشوشنا
وترمى الحزن مايشوفنا
فى سكة نور
يعديبنا الامل مية سور
ونفرد فى البراح روحنا
ويطلع ورد فى جروحنا
ويملا البور
وفاكر انى لسه هاطير
وانا واقف على كفك
ومستنى فى سجن
كبير
فسيبنى اكت
من سجنك
لاى مصير ……………..
التعليقات مغلقة.