بلاش تسأل
بقلم أحمد بدوى العميد
بلاش تسألنى مين انته
حروفى شايفها ميت حته
أنا نفسى بتوه فيَّا
وعينى صفر ع السته
منيش شاعر ولا أبَضاى
مجرد حرف رايح جاى
مشاعر كلها حُرقه
خلاصتها : أعيش ازاى
أنا اللى عِشت فى الغُمة
سنين محفورة بالظُّلمه
ولما الشمس حنِّت لِى
حياتى شفتها عتمة
بتِقرانِى وأنا الجاهل
مفيش مقتول وأنا القاتل
تشوف فيا كيان شادِد
لكن مفعول مهوش فاعل
بلا تسألْ أبوس راسك
وخلِّى عنيك ف كرَّاسك
بلاش تحلم تقرَّبلى
فـ تِلقى المر فى كاسك
نطقت الآهه بدموعى
وكَلت الطينه من جوعى
انا ابن الموت لكن عايش
عشان الموت مهوش طوعى
التعليقات مغلقة.