بلاش عتاب
قلم أسـمـاء الـبـيـطـار
العِتاب .. كلمة يحسبها البعض بسيطة و لكنها من وجهة نظري المتواضعة هي كل الحياة .
يعني إيه ؟
يعني العتاب بيوضح الصورة ، بيكبرها ، بيخليك تشوف الناس أوضح
و على حقيقتها على الأقل تجاهك .
و يمكن العتاب كلمة مربوطة دايماً “بالعشم “
اللي بيبقى واخدنا قوي في سكته ، سكة ماشيين فيها زي القطار
لكن للأسف بندوس فيها على كل حاجة فينا مش فيهم ؟!
لحد ما ييجي موقف و ” تتعشم ” في اللي قدامك ” بالعتاب ”
و يمكن أغلبنا حقيقي بدون مبالغة ” بيصعق ” برد الفعل ؟!
و بتلاقي الدنيا في لحظة لفت و دارت بيك ، يمكن حالة الذهول اللي تبقى فيها بتوقف عندك الزمن في لحظة .
صحيح مش هتقدر ترجع اللي راح من عمرك .
لكن في لحظتها بتبقى إنسان تاني يمكن إنت معرفرش .
عارف إنت المقولة الشهيرة اللي بتقول ” وقع على جدور رقبته “
حقيقي لما عتابك بيكون محبة ، و ما تلاقيش المحبة دي فعلاً حاجات كتير بتنكسر فيك ..
يمكن الحاجة الوحيدة اللي طلعت لقيت أبويا الله يرحمه مش بيعملها
” العتاب ” ساعات كنت بستغربه رغم إن روحه كانت بتبقى في الشخص اللي المفروض يعاتبه !
لكن أقصى ما كان عنده إنه بيبعد فترة ، لحد ما يروق لوحده من غير عتاب و لا غيره .
لكن حقيقي هو صح على الأقل بتفضل بنيتك الطيبة تجاه الشخص اللي قدامك إنه على الأقل ” بيعزك “
و لو مضطر إنك تعاتب ” هي مره واحدة فقط ”
رغم إنك بعدها ستتغير .
يبقى على الأقل تعرف تعامل الناس صح ، و تقدر نفسك اللي كنت مغمى عنيها بالعشم .
و لو عاوزين الصراحة ..
أفضل بلاش عتاب من أساسه و لا حتى مرة
علشان تقدر تدي و أنت مش مكسور ، مش مخذول ، مش شايف نفسك ” متعري ” من إهتمام اللي قدامك حتى و لو بعتاب .
التعليقات مغلقة.