” بلطجة ” شعر عامية بقلم أحمد فؤاد الهادى
نفسى اتعلم وابقى معلم
وامسك مطوة وسنجة وسيف
اخطف شنطة واطير بالتوكتوك
ولايمنعنى أعلى رصيف
آخد حقى واشبع بؤى
مش طول عمرى هابقى ضعيف
لما اتكلم كله هايسمع
لو حتى كلامى كان تخاريف
وابقى خبير مجلاته كتيرة
ماهي كل الناس دلوقتى خبيرة
القنوات راح تجرى ورايا
تعشق وشى وحتى قفايا
كله هايدفع زى المدفع
كله عايزنى أكون له الضيف
أسن سنانى واسم لسانى
ألاقى الغالى ببلاش جانى
أرمش رمشى كله هايمشى
وأبقى رهيب قاسى ومخيف
تمشى مصالحى وكله ف صالحى
امشى مخالف وسط الزحمة
واعلم قلبى ينسى الرحمة
ينسى الحكمة وينسى الخوف
دى الرحمة حروف والقسوة حروف
قابل مايكلك أسد القسوة
بطل أنت تبقى خروف
التعليقات مغلقة.