بنت الندى بقلم / مدحت رياض
الفجر بيدق
البيبان المقفولين
والليل بيجمع
في الحاجات
المبدورين
من سكته
لجل النهار مايفوت
على جناحه الأمل
من فرحته
بيوم ابتدا رقص الندى
والورد مال من رقته
فوق غصنه يشرح
كل حاجة في قصته
عن عشقه للنور والجمال
عن رسمة القلب اللي مال
من سهم صابه في وحدته
مبقاش بيشكي لحد غير
نجم الليالي الحيرانين
كل الحاجات اتبدلت
حتى العيون السهرانين
الليل بيجمع صحبته
وبيرحلوا
طب وانت ليه محبوس
وراضي تكمله
النور بيجمع كل خيط الشرنقة
وبيغزله
فستان لبنت بتبتسم
وقت الندى
طب قولي ايه معنى الرضا
لو ترفض النور والأمان
الحزن ليه تتحمله
والروح بيخنقها المكان
لو ضاق عليك توب الزمان
اخرج لرحمة رب قادر ينصفك
ويوقف الجرح اللي كان
طول السنين بيكتفك
ارفع له ايدك وابتسم
تلقى الرضا
والبنت تلمح طرفها
فرحانة بالنور والندى
التعليقات مغلقة.