بيبان الـدار ” البخت لو مال “بقلم الفلاح الفصيح معوض حلمي
البـخـت لو مـال ، بيـمـيل القـســـــــمه
والرزق مش مال ، ولا جـمـع ولا قسـمه
الرزق وش باشوش ، وقلـب فيه الرضا
تملك أراضي وفضا ، وتطيب لك النسمه
مش كل غيط اتحرت هايخضر المبدور
ولا كل جرح اتفرط هايطيب بزار وبخور
قـفل بيـبان الـدار جمـدها بالترابيـــس
الندل طبعه خسيس ، بيعس بين الدور
إوعاك تقول مؤتمن في زمان ماليه العيب
وإياك تسيب الغنم ترعى ف زمام الديب
مهما الجروح بتطيب بتسيب أثر وعتاب
زي اللبن لو راب ، مايعودشي تاني حليب
ـــــــــــــــــــــــــــــــــــــــــــــــــــــــــــــــ
بقلمي الفلاح الفصيح / معوض حلمي
منشأة بطـاش / تمي الأمديد /دقهليه
التعليقات مغلقة.