بيتنا القديم قلم.. حسن أبوعرب
بيتنا القديم على م افتِكِر
والمَغرِبِيَّه مرَوَّحَه
مِشعال عفُورى ولمبه جاز
غُربَال وقُلَّه ومطرَحَه
حيطان بتسنِد بعضها
بالوِحده كات متسلَّحَه
إقراض وئِيد كات للكَنُون
والمحشِّى رِيحتُه مفحفَحَه
والسمنِ بلدى للطبيخ
والجِبنَه مِش ومَنفَحَه
فى الفُرن كَردُوشَه وفطير
كام وِزَّه سِتى مْدَبَْحَه
خَارجَه الصوَانِى فى الميدان
والخلق نايمه مِمَرَّحَه
صَيِّيت ومُولِد فى البلد
سمِيعَه قَعدَه مصحصحَه
وحلاوه على حَب العزيز
لعيال م شِبعِت مرجَحَه
بيتنا القديم على م افتِكِر
مفتوح بِبَانُه ع القمر
وانا كُنت عاشق منقَدُه
مع سَطل شاى م المُعتَبَر
ودا جُزء كان مِن مَنهَجُه
وان حد تاه عن دَربِنَا
بالحُب كنا نرَجَعُه
بيتنا القديم على م افتكر
أروَاح جدُودِى بتسكُنُه
ولا يختلِفشِى عن الهرم
م انا زَرع سِتى ونَبتَهَا
مِترَبى دايما ع القِيَم
فلاح أصيل ابن بلَد
جِوَايا ماضى م اتهَدَم
بيتنا القديم على م افتكر
مفتوح بِبَانُه ع القمر
مفتوح بِبَانُه ع القمر
التعليقات مغلقة.