بيت العيلة بقلم / جيجي حافظ
هل الزواج أفضل فى بيت العيلة ولا الزواج بعيدا عن العيلة ؟
سؤال لفت انتباهى فى أحد المواقع ….أخذنى الفضول لمعرفة الآراء …..
للأسف صدمت إن نسبة 90%من التعليقات رافضة الزواج فى بيت العيلة والصدمة الأكبر فى السبب أو ما يظنون أنه السبب الصحيح.
طب هو إيه اللى حصل فى الزمن …..؟
أعتقد أن غالبية أهالينا وأجدادنا وأجداد أهلينا كانوا يعيشون فى بيت العيلة وخرجوا أجيال عظماء وعاشوا حياة كريمة مليئة بالدفء والاحتواء والأمان
لية جيلنا والأجيال الصاعدة رافضين كل حاجة حلوة …. لية عاوزين العزلة والبعد عن أحب الناس ليهم. …
_بجد سؤال غريب احنا كل يوم بنبعد عن الصح …عن الخير ….عن التقرب من الله ..عن الجنة بكل الطرق وبنحاول كمان نقنع أنفسنا بردودنا إن احنا كده بنمنع المشاكل وبنحافظ على العلاقات السطحية بين أعضاء الأسرة الواحدة. …
ازاى يا جماعة؟
أنتم بجد فاهمين الموضوع غلط
الموضوع ممكن يحقق نسبة من السعادة فى بداية الأمر لكن على المدى البعيد يسبب فرقة وألم فى الروح …وإحساس تانى مخيف لما تبقى فى نفس الموقف
يا جماعة الأيام بتجرى أوى ومصيرك يا ابن هتبقى أب…… ومصيرك يا بنت هتبقى أم …..صعب أوى لما ألاقى بنتى تفضل تبعد عنى ….وابنى مش عاوز يقعد معايا ….ليه ؟
علشان شوية تنازلات منك أو من شريك حياتك (سواء كان الزوج أو الزوجة ) …
أو علشان تنفيذ شوية طلبات ممكن تتعب الجسم
صدقونى تعب الجسم ولا حاجة جنب تعب الروح و تأنيب الضمير
أجمل إحساس إنك تحس إنك مصدر سند وأمان لأبوك وأمك سواء كنت ابن أو ابنة،الواحد ساعتها بيحس إنه خلف وإنه مش لوحده فى الدنيا،
الفرحة بيكم وبأولادكم وبلمتهم حواليهم (الأب والأم)مش هنعرف نقدرها إلا لما نبقى فى مكانهم بس للأسف ساعتها بيكون بعد فوات الأوان…
أنا عارفة إن فى حموات صعب التعامل معاهم.(فعلا يتدخلوا فى كل التفاصيل الخاصة بأولادهم …ومن المعروف إن فى أمور ممنوع الاقتراب منها )….بس بتهيألى الموضوع ده محتاج حوار صريح بين الابنة أو الابن و والدته فى بداية حياته فقط ..ولكن يعتبروا هؤلاء شواذ القاعدة، ولكن الاهتمام بيهم وإرضاءهم واجب عليك لمصلحتك ….صدقونى لما تحاول ترضى شخص صعب التعامل معه بتحس بإنجاز فظيع فى حياتك مابالك لما تكون أمك أو أبوك …..
ده كله واحنا متكلمناش عن رضا الخالق
أنا بس بتكلم عن مشاعر واحاسيس
حاسة إنى بكبر ومش هقدر ابنى أو بنتى يبعدوا عنى مش هستحمل فرحتهم وحزنهم بعيد عنى وهبقى حابة اشاركهم كل حياتهم ….
فصعب لما ألاقى ابنى وبنتى هما اللى عاوزين يفارقونى ويفارقوا بيت العيلة…..ليه؟
العيب فى مين ؟الأم والأب ولا الأبناء؟
أيا كان العيب لازم نصلحه …..
يا جماعة بيت العيلة ده يعنى الخير كله….الرزق ….الأمان …..السند …اللمة الحلوة وقت الفرح ….واللمة القوية وقت الشدة
مهما دورت فى حياتك على حد يقف جنبك مفيش أقرب من أمك وأبوك ولا من دعوتهم صدقونى فرحتك بتزيد بفرحتهم وحزنك بيقل بطبطبتهم ليهم سحر غريب حتى لو كانوا متعبين ….
عارفين إحساس رضاهم عليك بيحسسك بمستقبل آمن بإن أكيد اللى عملته مش هيضيع
نفسى نعمل كلنا تجربة سواء( أبناء أو آباء أو أمهات) .إن كل واحد فينا يضع نفسه مكان الآخر ويجرب (فى كل المواقف) ده هيوجعه فيرفض فعله مع غيره …حاول تحط نفسك مكان غيرك بنفس تفكيره.. وتقاليده …وعاداته ..هتقدر أوى تصرفه وممكن كمان تحتويه. …
__اليتيم بيدور على أهل يحتمى فيهم من غدر الأغرب ….واحنا بنبعد عن أهلينا من أجل الاستغناء …غريبة مش كده؟
التعليقات مغلقة.