بيداري الوجع بقلم شيماء عادل

ملفوف بكف الحزن
بيداري الوجع
راسم على قلبه ورده
مش بيشكي لحد همه
وايه اللي همه ف الحياه
غير انه يهرب من جدار
مليان هموم
الكل حاسده ع السعاده
العمى مالي قلوبهم
ماسك ف توب الوجع
بيخيط اللي داب
كفه الحزين انحني
ساند بعجزه الباب
خايف علي اللي باقي
رافض يكونله احباب
اشكي لقلب الوجع
ما بشوفش غير زهره
دبلانه م القهره
وسنين عجاف اتكعبلو
خدو مني عمري ف اوله
واسأل تجاوبك السنين
ممنوع ومرفوض الحنين
ولا اي حد يكون سند للمحتاجين
الكل رافضين الهروب
للشمس مانعين الغروب
مع ان ف غروبها حياه
شقيت معاني الصبر
مالقيتش الا خوف
حاضن ف جوفه الالم
هتهت ف نص الوجع
كفه البرئ محتار
فارش جناح الخوف
عايش ف وسط النار
الصبر مش جدعنه
ولا حرفه تتعلم
صبري مهوش معلمه
الصبر من صبري
مل واتكلم
قال سكاتها مرض
ف القلب بيعلم
علل :سكوت الوجع؟
ويا انهزام الروح
من كتر ضغط النفس
رفضت جراحنا البوح
ضعفت سنين روحنا
كل الآمال بترروح