بيع أو شرا …معوض حلمي
في الغربه إحساس مختلف
بتلاقي خوفك وبصراحه
ويا روحك مؤتلف
والغربه مش معناها إنك تسافر
ممكن يجيلك منهم كام سهم غادر
تصبح غريب الدار والاهل والمخاليق
وتعيش غريق في وسط موج نافر
لاشط ليك ولا مرسى حن عليك
تايهه الخطاوي وماشيه للتلف
وتحس خوفك وبصراحه
ويا روحك مؤتلف
وانا برضه إحساسي استجار
داير في مدار الغربه / جنتها مرار
بتدغدغ فيا النور والنار
خلتني احتار
مش حاسس بيا ومش عايش
من كتر الأحزان انا بايش
ولبست كلبشاتي غوايش
ومفارق قلبي عتاب الدار
والتار اللي مابيني وبين الأيام
واقف قدامي ويديني تمام
حالف لايخلص ع الباقي ف إحساسي
وانا ناسي الفرح بقالي سنين
مليان بأنين بإيدين محترف
والآقي خوفي وبصراحه
ويا روحي مؤتلف
في الغربه إحساس مختلف
شايفك ياخلي
روحك بتطلع وانت حابس ضحكتك
وسواس بيكبر جوا منك
لما دابت جتتك
مش لاقي حضن يدفي روحك
وسعت جروحك وانت بيها معترف
وتلاقي خوفك وبصراحه
ويا روحك مؤتلف
وبرغم عتمة سكتك بابك موارب
لفيت على الفرح الأمين
سألت عنه العطارين
لقيته جوا الروح دفين / والهم غالب
عمال تحارب دنيتك وانت الضعيف
مش لاقي إبره لهدمتك
ولا همتك جابت رغيف
بتمد إيدك بالسلف
وتلاقي خوفك وبصراحه
ويا روحك مؤتلف
والغربه إحساس مختلف
بيلف بيك الأديره
وتحس وجعك زي طلق الأعيره
بتمد إيدك للإله وطالب مغفرة
وانت اللي معروض للبشر
بيع / أو / شرى
وانت اللي معروض للبشر
بيع / أو / شرى
…………………………………….
بقلمي الفلاح الفصيح
معوض حلمي
منشأة بطاش
تمي الأمديد
دقهلية
التعليقات مغلقة.