بيــاض القـلـــــب …بقلمي خون أنوب الجديد معوض حلمي منشأة بطاش ،، تمي الأمديد – دقهلية

بيــاض القـلـــــب …بقلمي خون أنوب الجديد معوض حلمي منشأة بطاش ،، تمي الأمديد – دقهلية

وازاي أنسى ياستي الشال
وإيديكي المرهم ف اللفه
دا انا لسه معايا الخلخال
وف أوضتك روحي بتدفى

بيتنا القديم رغم أنه كان طوب ني
لو قلت فيه المدد ينده يقولك حي
قلبه الكانون والفرن والجرن واسع براح
وناروزه ع الفتاح مفتوحه جايبه الضي

وانا ستي كات مدرسه وبعلمها ونسان
لو سـوقت فالمريسه ،تنصحني بالإحسان
وتقول لي أدب الولد ، بيزينه الإحسـاس
وعشان تسـود الناس ، لازما تكون إنسان

ياحمل الصوف ع القبه في البيت الكبير
عرقك على الجدران وطارح بالعبير
رغـم البـعاد المر لســـاكي طـاقة نـور
لسه الحنان مبدور ونايم في الضمير

حوق النشوء وبواقي القايمه فالصندوق
طقم السـنان وختمك المطـبوع بذوق
بذر المحـبه اللي اتزرع بإيديكي إنتي
معجون بطينتي ياحبيبتي ماليني شوق

لمسة إيديكي ع الهدوم عطر الورود
باتوضي منها كل يوم قبل الفروض
حـافـظ دعـــاكي زي نســـــمه قـريبـه
تراتيل صـــبا لطـفل بيتـهجي السـجود

مشتاق لبياض القلب الباين في عينيها
الضي الطالل من ستي كان سارح تفاريح
كات تجمع كل حمام الدار حواليها
كات تقعد تحكي الحواديت تسابيح

كات تبعت كل حنانها يطيب لي الاحلام
كنت بانام لما اسمع صوتها تغني لي
كات تفرد ألف جناح وتصد الريح لو هام
كات روحها بتحرس روحي وتدعي لي

كات إيدها تطبـطب زي حنـــين الناي
كان حضنها سكر بيحلي اللقـمه الحاف
كات تفرد نن عنيها مراتب للبرد الجاي
وتشـد الرمـــش عـــلى عنـــينا لحـاف

كات زي آدان بينادي عيال الدار للنور
تبدر حواليهم كل جمال يخضر سنابل
كات ضحكه بتطرح فرحه فغيطنا البور
كات زي صبايا الحور وغناها بيلم بلابل

كات تاكل بعد ماناكل وتشوفنا شبعنا
وإزاي نتعب والنبض والواصل منها حياه
لما بتضحك ضحكتها بتمسح مدامعنا
ونلآقي قـلوبنا بتطرد مـن جواها الآه

قبل مااخطي العتبه لبره كات تعدل ياقتي
كات هى مرايتي ومن حيلها باشد الحيل
وانا سارح ويا الآه من بعد ماماتت ستي
لاحد بيعدل ياقتي ولاعين بتشوفني جميل