بيكيا بقلم امل محمود عبد الرازق “مليكة محمود”
ياعم يابتاع البيكيا
يمكن يكون عندك رؤيا
في ناس قلوبهامجروحة
وناس بتزعق مدبوحة
وناس حياتها مطحونة
وناس ف روحها مطعونة
عندك دوا ليهم
ولا أقولك تشتريهم
فيه قلب حب بإخلاص
لكن وراه دايما بصاص
وبالفلوس بيكون مصاص
ياعم يابتاع البيكيا
هي القلوب تتباع بفلوس
واللي ممعهوش مايستهلوش
تعالى شوف
اعمل معروف
بضاعتك جاهزة عندنا
وقلوبنا مليانة ألم
وعيون ممسوحة بحلمنا
وأرواح تاهت مننا
ياعم يابتاع البيكيا
في السعر مش هنختلف
وبكل مابينا هنعترف
ولا مش قادر علينا
المزاد قدام عينينا
يحضره كل العباد
والكل يعرف المراد
ياعم يابتاع البيكيا
قلوبنا ملاها الصدا
وعيونا ملاها الجفا
عايزين ساعة أمان
عايزين لحظة حنان
عايزين حبة سعادة
تكون سكر زيادة
تنسينا كل الهموم
تورينا ضوء النجوم
عايزين اللي يحمل همنا
وبكل قلبه يضمنا
أنا مش بقول حكاوي
ولا محتاج الغناوي
ولا دا كلام قهاوي
والله دا حلمنا
وهو دا حقنا
واللي مش قادر عليه
بتاع البيكيا يتكفل بيه
التعليقات مغلقة.