بين قوسين … بقلمي وحيد علي الجمال
لما ترجع تاني تكتب
في الأدب أو في السياسة
راح تعبر وبلطافة
اوعي تاخدك الحماسة
لو هتسخر من حياتنا
تنقد الحاصل في جيلنا
واللي كعبلنا في طريقنا
بدل الجد بهيافة
خد نفس بس بهدوء
خلي بين الكلمة كلمة
حتى لو كانت حراسة
حتى لو عملوا دراسة
حتى لو قالوا زيادة
عينه فارغة لا طفاسة
حتى لو كررت معنى
او خرجت عن الكياسة
هي ممكن تبقى قافية
او بعافية ماهش بعازة
بس وقت الساعة حاضرة
تعدل المعوج نصابه
توزن الكفة اللي مالت
اوعي خوفك يبقى مالك
تبقى عايش وانت ميت
حرف مولود جوة حارة
نفس ذات الحرف هو
بس عايش في الزمالك
بين قوسين خليك في حالك
أنت ممكن فيها ترجع
واندفاعك يبقى قاسي
والمشاعر تبقى أووفر
واضحة جدا مش ذكاوة
اوعى سطر تسيبه فاضي
يبقي عرضة للمعاصي
يبقى مطمع وانت راسي
ع اللي شوفته من مآسي
حتي لو كونت جملة
طولها أطول م الزرافة
خلي بعد الجملة شرطة
تبقي صده في أي ورطة
حتى لو كانت أونطة
حتى لو شايف وجودها
زي حالنا خيال مآتة
خلي في حروفك مسافة
واسند الحرف بشقافة
اوعي حرفك في الوجع
يبقى واخد على الفزع
حرف فافي وبمياعة
لسه واخد ع الدلع
هي مش طالبة حقيقي
نحضن الحرف اللي ماسخ
الإيدين رافضة تكمل طبطبة
جوة أسوار الهوامش
اوعي تطلب هشتكة
اللي زيه في ثانية واحدة
راح يسافر في الوبى
ربي حرفك ع النظافة
لجمه وزود حراسة
اوعي يهرب م الكياسة
او يحود ع النجاسة
أو يحاول أنه يشفع
للباعوا في النخاسة
رجع الحرف لنصابه
اوعي مرة تخاف كلابه
او تصاحب اللي ذله
واللي في مقتل وصابه
شربه صبر الكيعان
اوعي مرة يبات جعان
او ينام عند الجيران
راح يذيع سرك آذان
او يبيعك للودان
فيه حروف تصلب في طولك
وفي غيابك راح تصونك
هي ذات نفس الحروف
تكسرك من غير كسوف
لو تميل بيك الظروف
مهما تطعم في البطون
راح تخونك
الحروف بنت اللسان
طبعها طبع المكان
هي فرحك وقت فرحك
هي أول سهم جرحك
اوعي حرفك يبقى سجنك
اوعي ترضى ينام في ظلمك
اوعي تسمح باغتصابه
حتى لو ضحي بشبابه
اوعي مرة تعيش جبان
أو تعيش عمرك حمار
كل حلمه يكون حصان
وحيد علي الجمال
التعليقات مغلقة.