بَرّدان!! بقلم: حبيبة سلام
بَرّدان وِبَتَكْتِك وِسْناني
بِتدَّندِن لَحن مالوش مَعنى
بَس اِشْمَعنى
قلبي المجروح عمَّال يعزِف
عَ البُكا حَواديت
ولا حَدِّش عايز يسْمَعنا
وْ يسْمَعنا ازَّاي
وِكَلامنا فْ شَرعُه مَلُهْش لْزوم
مَهو عُمْرُه ما كان مَرّْة مكانّا
ولا جرَّب يبكي بْصوت مَخْنوق
وَلا عُمْرُه هَيقدَر يفهَمْنا
غير لمَّا يْدوق
بَردان وِالبَرد نَخَل عَضمي
وِالدَّمّ بْيجْمَد في عروقي
وِالْقلب بْيبكي وْ بات مَفْطور
وِالعين بِتْسِحّ ألم وِدموع
دا لا هِدمَة تْقيلَة تْدَّفِّيني
وَلا لُقْمَة تْسِدّ رَمَق مِ الْجوع
أنا عايش في الدُّنْيا بَعافِر
مِحتاجْ لِلدَّفا وِالْجوع كافِر
وِالْخير حَوالَيّا مالُهْشِ حدود
وِالحوجَة دي غُول قاسي وْ
مَسعُور
بِيثور لَمّا تْضيق حَلَقاتُه
وِالدُّنيا بْحالْها فْ نَظَرُه تْهونْ
وِبْتِرخَص في عيونُه حَياتُهْ
وَانا مِشْ طالِبْ ولا مالْ وَلا جاهْ
غير حَبِّة رَحمَة يا أَهْلِ الْجُود
التعليقات مغلقة.