تتكبر ليه بقلم مدحت رياض
مغرور على ايه
والأصل تراب ؟
والشعر ان شاب
هتميل غصب تبص عليه
وجمال الطول والهيبة ان غاب
الضهر المحني هيسأل ليه
موش قادر تصلب طولك بيه
ياما أكتر منك عزوة ومال
أو صحة وجاه
واندفنوا شباب
متكبر ليه على خلق الله
ما القصة تراب بيلم تراب
بتحس بغيرك لو يوم تاه
او بات مكسور ؟؟
فكرت في نفسك لما هيبجي
عليك الدور ؟؟
متحطش نفسك جوة فراغ
وتعلي السور
ازي لو غيرك يشكي الضلمة
تخبي النور !!!
هتودع كل اللي انت عليه
وهتمشي نضيف
ما العمر أن طال
الاصل أن انت هتفضل ضيف
والمال والأهل وكل الفخر
ده شئ متساب
مغرور على ايه والأصل تراب
التعليقات مغلقة.