تخاريف.. بقلم وحيد على الجمال
كان لازم اخبي الليل في عينيكي
وأسِد حيطاني من الشبابيك
ما انا كنت ساعتها ماسك في ايديكي
وببيع الشمس مع الحواديت اتاريني صالحتك..
وقت مازرعوا في قلبي وروحي عيدان كبريت
انا متوضيتش لما أقاموا الصلا في البيت
يممت في قلبك آخر عهد وآخر سطر وآخر حرف
كأني في حبك انا شَكِّيت
انا اتخضيت
ماهو مش معقول الفجر ينام ف ايديكي مقتول
مع إن الفاعل عايش بينا ماهوش مجهول
أنا كنت بخطرف لما حلمت ان انا عديت من فوق السور
اتاريني بدوَّر ع اللي سرقنا وقت ماشوفتك أخد الدور
معرفش ازي انا كنت بطير مع ان ضميرك كان مقفول
تفسير الحلم ماهوش مقبول طب ليه بتسامح ..
وانت في قلب البير مسحور؟
طب ليه السجن ملوش قضبان؟
مع إن حيطانه راكبها كابوس
مش شايف غيرك فيه مسجون مع إن الحق معاك ..
بيقولوا عليك مجنون!!
هي الأحلام وقت الأحزان بتغيب وتصوم؟!
شايفِك عَمَّاله تهِزي حروفي على التليفون تقصد بكلامك ايه؟
دا كلامك نُصه ماهوش مفهوم
انت اتعودت تلِف دموعك مع أوجاعك
وكأن الذنب عليك موصوم
وحيد على الجمال
التعليقات مغلقة.