تخيلتك بقلم نهلة الديب
تخيلتك سنين قبل اللقا
بنفس المكان
تخيلتك
تخيلتك
ملاك فارد جناحاته
بيتبسم ويحضني
وكاتم كل آهاته
وبالضحكة يطمني
تخيلتك
غزال شارد
وبيدوّر على خِله
عاوز يحكيله ويقوله
بحبك موت
ويفْرحْ بالوصال والقرب
تخيلتك
سفينة نوح
وجوا قلبي بتبحّر
مابين فرحي
وبين النوح
رسايل عايمة تتمختر
وأنا وأنت وأشواقنا
بندعي الله ونستغفَر
تخيلتك
غيامة صيف
بتحميني من الشمس وحرارتها
ووقت ماأخاف
تخبيني من الدنيا وقسوتها
وأنا وياك
بتوه من كل أحزاني
وإيدك ماسحة دمعتها
تخيلتك
ضباب فوق السحاب
أموت وأعرف
مخبي إيه
وأطير وأسرح وأوصله
بلاخوف من سقوط فجأة
معاك أنت اللي تجذبني
وتمنع عني أي سقوط
ولو سهوة
تخيلتك
حياة للروح بلا نهاية
ولو ماكنت ويايا
أو ما دخلت دنيايا
هكون عايشة
وروحي بعيدة عن جسدي
ورافضة تكون جوايا
تخيلتك
فعز الدموع فرحة
سواء فايقة سواء سارحة
معاك دمعي هيتحول
من الأحزان للضحكة
تخيلتك
حنان أمي فضمتها
وأبويا فظهري طول الوقت
وأختي بتحكي أسرارها
وأخويا ساندني وقت الجد
وقلب حبيب بيعشقني
بيوعدني الغرام والود
ويصدقني
مايخلف وعد
تخيلتك
نسيم البحر ومحاره
وأنا عاشقه لأمواجه
ولو هغرق
ألاقيك جنبي وحاميني
ووسط الموج معديني
بكل أمان
تخيلتك
التعليقات مغلقة.