تمثال خشب
بقلم المهندس / أسامه أنيس
مكانك هنا … واقف ع الرف
عينك ما تشوف غير جنب واحد … أوعاك تحرك طرف
بيلمعوك علشان يركنوك … بعيد ووحيد فى كل ظرف
لا لك تعيش ولا لك تموت … لك بس وقفة آخر الصف
لا بتنطق ولا بتحلم … يا حتة لعبة محطوطة ع الحرف
يلعبوا بيك ويفككوك … ويكسروك ويرموك …
مالكش قيمة … وشبهك بدال الواحد ألف
….
عمرك ما بتحس … ما هو أصلك خشب
يلبسوك ما يلبسوك … بدلة تكون ولا جلابية قصب
ويحطوك خفير ولا شاويش … أو حتى عمدة بشنب
برضه أصلك خشب … لا يوم حتبقى فضة ولا دهب
لا صوت ولا نفس … ولا ييجى عليك فى يوم الطلب
ويكفروك ويقولوا صنم … مذنبينه وبيعلموه الأدب
يا عروسة دكر محشورة ومخنوقة وسط الكتب
لا تحزن ولا عمر عليك العتب
لا أنت ولا أهلك تعرفوا الغضب
أبوك وأمك … كلكم أصلاً لعب
ولو بكيت ويالا العجب … دموعك برضك خشب
التعليقات مغلقة.