ثقافة تودي في داهية…بقلم أسـمـاء الـبـيـطـار
من صُغرنا طلع أغلبنا على ” شنطة أعشاب الجدة “
أي مرض أو عرض لمرض مُجرد إنها تحط ايديها في الشنطة
تطلع العلاج المناسب لحالتك !
عندك كحة ، حساسية ، زورك بيوجعك ، رجلك أياً كان اللي عندك بقى مش فارقة .
لكن لما كبرنا شويتين الدُنيا إتمدنت شوية عند البعض لو فيك إيه و قولت بس ” تعبان “
بيكون العلاج خُد لك أسبرينة و كوباية شاي و هتبقى زي الفل !
ووصل الأمر ببعض الفئات إنك ما ينفعش تشيل حاجة من جسمك !؟
زي اللوز مثلاً على الرغم من الخطورة اللي بتسببها للقلب و بتأثر على الحركة في بعض الأحيان إلا إن بعض الأسر بترفض رفض تام إن أولادهم يعملوها .
بحجة إن وجودها أفضل و بتشيل عن الجسم ” سموم “
مش عارفة منين جابوا الإعتقاد دا ، لكنه للأسف كان موجود .
المشكلة إن الأمر تطور و إن العرض اللي عندك شبه اللي عند فلان اللي راح كشف مثلاً ، بيقي تلقائي بناخد العلاج اللي أخده !
دا غير الأدوية الخاصة بالعظام زي الفولتارين ، و نزلات البرد زي الإسكرونيد و الكونجستال و المصيبة الأعظم البروفين اللي بيتاخد لأي وجع فيك ؟!
و بقت أسماءهم محفوظة عن ظهر قلب ، و بنتداولها بينا و بين بعض و كاننا أصبحنا أطباء جميعاً بالنقل و الفطرة ؟!!
دون مراعاة للأثار الجانبية ، أو إكتساب مناعة من النوع دا من الحبوب و بندور على أنواع أشد للأسف .
و طلع أجيال كتير مننا للأسف على الحال دا .
لحد ما بنكبر و بنوصل لمرحلة لابد من زيارة الطبيب ، و اللي للأسف بتدخل عنده ، عندك شكوى بسيطة بتطلع من عنده عندك أمراض الدُنيا كلها و للأسف بتوصل لمرحلة العلاج المستمر .
ثقافة زيارة الطبيب أو الكشف منذ الصغر لشكوى دائمة للطفل
شئ ضروري و مطلوب ، لتدارك أمور فيما بعد إحنا في غنى عنها .
ملاحظة الأم الجيدة لصحة الأطفال ، و مراعاة أي تغيير بيحصل لهم شئ ضروري جداً ، خصوصًا في زمن الوجبات السريعة .
للأسف أطفال كتير طلع عندهم داء السكري .
و كانت بتبقى صدمة الأهل صعبة بالرغم إن العامل الوراثي مش موجود لكنه حصل و بيدخل في مرحلة العلاج بالإنسولين مباشرةً .
الإجهاد المتكرر للولاد في مرحلة المفروض إنهم بيكونوا في أعلى درجات نشاطهم بسبب نقص الحديد و تفاقم درجة الأنيميا عندهم .
بدرجة يصعب علاجها في وقت قصير .
طفل دايماً بشتكي من عينيه ، ما ينفعش نقوله رووح هات إزازة قاطرة من الصيدلية تخفف الإحمرار أو الوجع ؟!
يعني أشياء كثيرة من هذا القبيل .
أسوء شيء ممكن نقصر فيه هو صحتنا
و حقيقي الصحة تاج على رؤوس الأصحاء
فـ إجعلها دائماً في المقدمة .
التعليقات مغلقة.