جحش ابن عمي
بقلم :حسن دردير
جحش ابن عمي لما ساب
كان يوم علي الشارع هباب
دورنا حوالين البلد
و ف كل بيت ورا كل باب
و حشتنا يا جحشنا
حاسين ف بعدك باغتراب
ما بقاش نهيق يطلع خلاص
ماطلعشي غير صوت الكلاب
كل الجحوش كوم إنما
جحش ابن عمي له سمة
كان عنده قصة ع الجبين
و عيونه خضرة مبرسمة
عنده تأمل ف الحياه
بيبص دايما للسما
ساعة ما يلبس بردعة
يمشي بتناكة و مرقعة
علشان كده كل الحمير
تلاقيها منه مولعة
و سريع قوي ماشي بقانون
الجري نص المجدعة
روحت اشتري لحمة و خضار
لو ماشتريتشي هنضرب
يرضيكوا يعني ماشتريش
و اتهان و بيتي يتخرب
سألت كل الجزارين
يا لحمة الراس انتي فين
و المخ فين و الجوهرة
ما أكلتهمشي من سنين
عملت بيهم شوربة إيه
تتحب قبل ما تتشرب
يا جوهرة يا أحلي عين
فضلت منها اقترب
بصلت لها و لقيتها عين
أنا شفتها قبليها فين
و عرفت هيه تخص مين
قولوا انتوا مين
جحش ابن عمي اللي هرب
التعليقات مغلقة.