جرب تعيش بقلم مبروك عبد الحفيظ هلول البحيره ايتاي البارود. السوالم بحري
(
بحور الشعر ملت من قلم بائس فحاول تبقا مش شاعر
وحاول تكره المعنى وتقتل كل إحساسك
بلاش عينك تكون أرض لدموع أمشير
يجيك الدمع على غفله وبعد ثواني تتمرمغ في ضحك برئ
بلاش تبقا في حزن جرئ
ودور بين صحارى الناس على واحه تبل الريق
على حوا تكون شبهك في احساسك بدون تزويق
وما تقوليش خلاص العمر بيودع فمش لازم ألاقي طريق
تعبت تهاتي وتطفي في نيران الظلم بدموعك وكان دمعك في ذاته حريق
يا ويلك لو يفوت عمرك بدون ما تلاقي قلب صديق
بدون غيمه تظلل جسمك المنحول قصاد ( سقر ) اللي حلفت لك تموت محروق.
لناس عاوزين لك الموته وكارهين ان لحظه تفوق.
يا راجل روق
وفكر في الوروود لما هتنقذ حلمك المشنوق.
وفكر ان مهما الليل يحيرنا هييجي شروق.
وييجي الصبح ينشلنا من الماضي بكل هدوء
وتيجي الفرحه من تاني
وييجي الحب من تاني
وتكتب شعر م الاول برقه وذوق
وهتجرب تعيش مره وهتصدق بإن الماضي كان أصلا زمان مسروق
التعليقات مغلقة.