جرب وعيش
بقلم أشرف الشناوي
جرب تعيش
وتحس إحساس
المفيش
جرب وجعهم
حس جوعهم
تلقى كل الدنيا
ديا ماتساويش
جرب وعيش
جرب ونام
من غير غطا
حس الهوا
وبرد الشتا
جرب وعيش
المرمطه
نام عالرصيف
واحلم تلاقى
فى يوم رغيف
احساس مخيف
انك تحس انك
وصيف
وانك يادوب
مخلوق ضعيف
وأنك فى دنيا
ماتساويش
جرب تعيش
حبة قلق
وانك يوماتى
بتتولد
علشان ماترجع
تتحرق
حس الغرق
حس ان حلمك
من ورق
وانك غريق
وبتتسرق
حس الدموع
م القهر لما
بتتخلق
وانك فى عز
الفرحه
روحك تتخنق
حس الضياع
وسط الخلايق
والوجود
هاتحس وبطعم
السجود
حبة برود
لو قلبك اتصاب
بالبارود
هاتحس مره بطعم
وردك والفلق
حس ان بكره
مش لاقيلك فيه
مكان
وانك يادوب
ربك سترها
بالحيطان
وانك تعدى
كل يوم
بس الطوفان
حاول تعيش
وتحس إحساس
الجبان
والخوف غيطان
تزرع وتقلع
فى الجراح
وان الوجع هو
البراح
مين اللى حس
بغربتك
او لسه فاكر ضحكتك
مين اللى شاور
يوم عليك
او حس روحك
تنخلع من بين ايديك
مين اللى قال
لازم تموت
علشان تصحى
ضمير بيوت
مين اللى سابك
للكلاب
تفضل تغالطك
فى الحساب
عيش العذاب
دا الفقر غول وبالف
ناب
عايزك تحس انك
مناب
جرب تعيش
مر الحياه
لو يوم قدرت
هانصبك عندى الاله
بس انت دايما
نشوتك زى الطغاه
جرب تعيش
انك تبيع .احساس
فظيع
انك تلاقى ضحكتك
بيقسموها
عالقطيع
والحلم داير
فى الحانات
يشرب ويسكر
بالساعات
علشان يضيع
جرب وعيش
يمكن تحس بهمهم
او يوم تلاقى فى دمهم
حبة بواقى
لحلمهم ………………….
اشرف الشناوى
شاعر عاميه
البرامون
التعليقات مغلقة.