جزار بـ ليسانس آداب
بـ قلم أسـمـاء الـبـيـطـار
كتير من شباب الأيام دي حاطط الشهادة عقدة في منشار
لما كان إبني في ثانوية عامة العام الماضي و كنت بتناقش معاه في ميوله و عاوز يدخل إيه علشان خاطر مستقبله بكل بساطة قالي اي حاجة يا ماما مش هتفرق ؟!
إزاي يا حبيبي مش هتفرق ؟
قالي حضرتك ما شوفتيش كم الخريجين اللي قاعدين على الكافيهات
من أول هندسة إلى باقي فروع الجامعات ؟
بصراحة اتصدمت من نظرة الولد .
أو من كم الشباب اللي عاملين ليه النظرة دي هو و اللي زيه
في بداية الطريق كده
و دي عينة من الشباب مش علشان هو إبني .
و طبعاً حصل نقاش طويل بيني و بينه على مدار العام الدراسي
هو الحمد لله مستواه كويس و رغم إنه جاب مجموع هندسة بس رفض يدخلها و دخل حاسبات و معلومات .
جميل هو ميوله كده و ما اعترضتش على اختياره لأن دا مستقبله هو .
و المجال حلو و مفتوح للعمل و دي نقطة مهمة جداً جداً في تفهم الأباء و الأمهات لأولادهم في المرحلة دي إنهم ما يضغطوش عليهم بتخصص معين زي فلان،، أو علشان لقب،، أو ولاد ما عرفش مين ما يبقوش أحسن منك،، و يمكن الكلام ده اللي بيوصل في النهاية لمرحلة الكافيهات .
أعتقد لو كان حابب المجال هيجتهد إنه ينزل و يدور على عمل ..
المهم ندخل بقى في موضوعنا اللي كنت عاوزه أتكلم فيه
المقدمة اللي فاتت عينه من الشباب سواء اللي مضغوط عليهم بمجال مش حبينه و مسودين نظرتهم للحياة و طبعوا على غيرهم النظرة دي .
أو اللي عندهم حاله من اللامبالاه .
كنت بشتري طلبات الشهر و رحت للجزار لقيته معلق شهادة على الحيطة في داخلة المحل و لأني زبونه جديدة بعد ما استقريت في القاهرة فعيني جت عليها .
قالي دي شهادتي معايا ليسانس آداب جامعة القاهرة
بس دي مهنة أبويا و أجدادي و بصراحة بحبها
قولته مش عيب .
قالي بس أبويا أصر اني لازم اخد شهادتي الأول .
يمكن ما اقدرش اكمل في الجزارة يبقى معايا شهادتي .
بصراحة احترمته جداً و جزى الله والده عنه ألف خير .
و سبحان الله دا كان مبدأ جدي أبو بابا الله يرحمه إن التعليم قبل التفكير في أي حاجة
معاك شهادة الأول و بعد كده إعمل ما تُحب المهم تكون متعلم .
الشهادة يا جماعة مرحلة من حياتنا مش بداية لمطاف أو نهاية لمستقبل .
لازم تبقى نظرتنا ليها أوسع و أكبر من كده و منحطهاش عقده في حياتنا و نوقف الدنيا عليها و نسعى للعمل في أي مجال بنحبه أو حتى متوفر ما نستسلمش لأمور روتينيه ممكن تضيعنا و تسلمنا لطريق ما نعرفش نرجع منه .
العمل عبادة ما دام حلال و في اي مجال مش لازم مجال دراستك .
اكتر ناس شفتها في حياتي ناجحة في محيط دايرتي الصغيرة دي الناس اللي اخدت شهادة و اتجهت لمجال بتحبه و بتفضله
و اكيد حضراتكم عندكم أمثله كمان .
و على فكرة أنا معايا بكالريوس تجارة بس بحب الكتابة من صُغري و هواية في دمي أكتر من مجال التجارة و الحسابات.
و لو كنت خُيرت بين مجال دراستي و بين إني أكتب لأخترت المجال الذي أنا معكم فيه الآن .
التعليقات مغلقة.